वर्षाला ५० पुस्तकं वाचायचं ठरवलं आणि ते चुकलं

जानेवारीत ठरवलं होतं – या वर्षी ५० पुस्तकं. मार्चपर्यंत १४ झाली आणि मी स्वतःवर खूश होतो. मे मध्ये लक्षात आलं की मला त्यातलं एकही नीट आठवत नाही.

आकडा हा वाईट गुरू आहे

पुस्तक हातात घेतल्यावर पहिला विचार ‘हे किती पानांचं आहे’ असा येऊ लागला. मग पातळ पुस्तकं निवडायला लागलो. मग जड वाटलं की मधेच सोडून पुढचं घ्यायला लागलो. वाचन नाही, ती जमवाजमव झाली.

मग काय बदललं

यादी फेकून दिली. आता एकाच वेळी एकच पुस्तक. संपलं नाही तर दोन आठवडे तेच. आणि वाचून झाल्यावर चार ओळी लिहून ठेवतो – कुणासाठी नाही, स्वतःसाठी. यंदा एकवीस पुस्तकं झाली आहेत आणि एकवीसही आठवतात.